domingo, 12 de novembro de 2017

UN NOVO APARELLO PARA A BIBLIOTECA

Estas últimas semanas, o Makerspace está cheo de rapaces con moitas ganas de xogar cos escornabots e realizar os retos de Librincios. Con tanta xente, sempre xurde algún que outro atranco; esta vez, unha roda rachou.

Decidimos ir á aula dos rapaces de 5 anos, que son todos uns expertos en robots, para preguntarlles que lle acontecía a peza. Logo de moito mirar e pensar como solucionar o problema atopamos unha solución moi interesante: tiñamos que facer unha nova roda!

O que non sabían estes pequerrachos era que. a partires deste ano. contamos cunha nova máquina coa que podemos traballar na Biblioteca e nas aulas: Unha impresora 3D.

A solución ao noso problema foi moi sinxela: descargamos a peza, introducímola na memoria da impresora e, ao cabo dun tempo... xa tiñamos unha nova roda en perfecto estado!

Os rapaces quedaron abraiados, e non é para menos. Esta máquina ten forma de forno e é capaz de realizar pezas tridimensionais.

Quén se anima a deseñar algo para crealo coa impresora?






venres, 3 de novembro de 2017

NOVO CONCURSO NA BIBLIOTECA!

Aquí tedes o primeiro concurso deste ano, esta vez de expresión oral

Como este curso andamos a voltas coa Historia, queremos propoñervos que vos metades na pel dalgún personaxe histórico para falarnos de algo que lle aconteceu...

Aquí tedes as BASES do concurso, onde explicamos todo con detalle.


E por se alguén aínda ten dúbidas... velaquí un vídeo como exemplo de participación
Queremos darlle as gracias a Miguel, o noso conserxe, por prestarse para meterse na pel de Colón con tanto entusiamo. Gracias infinitas!


xoves, 2 de novembro de 2017

SEIS HOMBRES

Hoxe deu comezo ao VI Ciclo de Contacontos da nosa biblioteca. Que ganas tiñamos!

Os primeiros cursos convidados a escoitar un conto foron 4º, 5º e 6º, pois na avaliación de final de curso os maiores observaron que case todas as propostas eran para os máis pequenos.

A profe e os alumnos de 3º puxeron en escena Seis hombres, de David McKee, editado por Libros del zorro rojo.
Este marabilloso album ilustrado resume dun xeito sinxelo a historia da humanidade cíclicamente, guerra tras guerra.

Seis homes, seis soldados, seis exércitos, seis campesinos... e unha historia de que se repite unha e outra vez ao longo dos séculos.

Aquí vos deixamos algunhas fotos desta sesión de contacontos. Aplausos para os actores!









martes, 24 de outubro de 2017

LENDO BAIXO O SOL NO DÍA DAS BIBLIOTECAS

A verdade que hoxe facía un sol tan bonito que, para conmemorar o Día internacional das Bibliotecas escolares, decidimos saír ler ao sol cos nosos afillados (e padriños).

Eliximos as lecturas con moito cariño (lecturas de outono, de Samaín, de medo...) e preparámolas con ganas para converternos en expertos contistas.




Logo de rematar as lecturas individuais, fixemos un contacontos conxunto que gusta a grande e pequenos: Corre, corre, cabaciña, de Eva Mejuto y André Letría, publicado por OQO Editora.

A profe contou unha parte da historia e nós cantamos outra. A verdade que foi moi divertido.

Por se non a coñecedes, aquí vos deixamos a historia completa en Contos do camiño da CRTVG. Pinchade aquí.


Que tal o voso día das bibliotecas escolares?

venres, 20 de outubro de 2017

GRAN REINAUGURACIÓN DA BIBLIO!

Hoxe, por fin, abriu as portas a nosa biblioteca. Que ben!
Moitos levábamos tempo agardando este día, pois encántanos pasar os ratiños do recreo entre libros e compañeiros...

Expectación ante o que ía pasar...

Hai uns días, chegaron unhas cartas ás aulas cun reto a resolver. O autor das mesmas era Librincios, que sempre ten preparada algunha sorpresa para comezar o curso.

As misivas da nosa mascota chegaron a todas as aulas.

Nelas, invitábanos a atopar o nome dun personaxe histórico relacionado cos libros, a literatura ou as bibliotecas. Dábanos algunhas pistas, pero non era nada doado...
Ao final, todos os cursos atopamos a resposta e recibimos a nosa invitación á inauguración. Librincios convidounos a todos á biblioteca ás 10:30 da mañá. 

Menos mal que acertamos todos!

Ao chegar, tiñamos ganas de saber para que eran as nosas respostas ás cartas, e Yaiza non tardou en contárnolo. Ao acertar o nome, recibimos un pergamino con información sobre o personaxe e outro reto aínda máis difícil: situalo na liña do tempo...


Claro! Este curso imos traballar arredor da Historia; ese é o noso tema anual! Que ganas de comezar!

Logo de entregar os pergaminos, contáronnos todas as novidades da biblioteca para este curso: un novo Atopa a resposta! con retos no makerspace; o recuncho Escroanbotízate para aprender xogando cos pequenos robots; os postos de ordenador; os Contacontos; o Clube de lectura...

Aquí tedes un vídeo de fotos que resume a actividade!



A partir do luns só queda gozar de todas as actividades e de todas as aventuras agochadas nos libros... Que ganas!